RSS

Monthly Archives: نوفمبر 2010

حياكم معنا على الغدااا

مساكم الله بالسرور وكفاكم الشرور

اليوم فتحت ايميلي ولقيت طبخه ( الرز بالخضار ) عجبني شكل الصور طبعا الاخت مصورة بالخطوات ، فقلت تدرين يابنت مالك الا تسوينه اليوم

والله وأنا اللي أشمر عن ساعدي وأدخل المطبخ وأسوي الغدا فكانت النتيجة واحد صفر أقصددد كانت النتيجة طعم لزيز ورائحة زكية تشق الراس واليكم الصوره

رز بالخضار

 

المقادير

دجاج منزوع الجلد ومتبل بالخل والملح لازالة الزفر .

رز منقوع .

جزر مبشور

بصل شرائح رفيعه

فلفل شراشح

ليمون شرائح

كوب بازلاء

مكعبات بطاطس

طماطه مكعبات ، ملعقة صلصلة

بهارات ، فلفل ، ماجي  ، زعفران او كركم

الطريقة :

أحمس البصل ثم اضيف له الدجاج وأتركه شوي ياخذ نكهة البصل ثم أضيف له الماء المغلي وأضيف الملح والهيل واعواد القرفه وورق الغار وأتركه الى أن ينضج .

بعد مايستوي الدجاج أتركه في صحن وأتبله بشوي كركم ، ثم اكشن البصل الشرايح ثم الطماط والصلصه وأضيف الجزر والبازلا ومكعبات البطاطس وفنجان من ماء الدجاج

ثم أضيف الدجاج والبهارات ومكعب ماجي مع تقليبه بحيث يكون جزء من الخضار تحت الدجاج والباقي فوقه ثم أضع فوقه شرائح الفلفل الاخضر وشرائح الليمون

وأتركه يتسبك ، ثم أعمل الرز بماء الدجاج وإذا نشف أكبه فوق الخضار ، أرش قليل من الكركم فوق الرز ممكن زعفران بدل الكركم .

وبالعافيه على قلوبكم ، طبعا لابد من سلطة أنا سويت تبولة ….

تبوله

وبطبيعة الحال بعد الغداء مالي غنى عن حبايب قلبي :

 

شاي بالحبك ، علك

Advertisements
 
6 تعليقات

Posted by في 2010/11/07 in أطباقي

 

يقولون انها اعترافات

سلام الله عليكم ورحمة الله وبركاته 🙂

شسمه ( زحمة حكي ) مررت لي واجب اسمه الاعترافات ، مهوب كنه نفس الواجب اللي انتشر بين المدونين ( التاج السلطاني ) اللي هو عبارة عن إظهار بعض الاسرار أحس نفسه غيروا بس الاسم ، ماعلينا أبقول كل اللي في خاطري عاد يعتبر اعتراف والا سر والا كلام نفس الشي .

1- أكره شخصية عندي اللي تكون من النوع مسوية نفسها ومحد فاهم الشي او الزين او المعلومة الصح الا إهي وأنا أبصم بالعشرة لو أسألها عن أمور دينها تطلع خرطي .

2- أكره الانسانه اللي يوم الله يفتحها عليها بعلم أيا كان نوعه : مهارة ، صنعه يدوية ، أو معلومة ، تنفخ نفسها وتجلس تنقد اللي أقل منها نقد تصغير وتقليل من شأنهم وهنا أقول لها ترى محد طلع من بطن أمه متعلم ولا في شي صعب الكل يقدر يتعلم ويتميز وترى الكبر لله ، محد بياخذ معه الا العمل الصالح والسمعه الطيبة فخل عنج الغرور والكبر .

3- أكره شي عندي اللي تكذب وتعتقد أن الشخص اللي قدامها مب فاهمه وتظن أنه مفهي ولا يدري وش السالفه ، وأقول لهم ( ليس الغبي بسيد في قومه لكن سيد قومه المتغابي ) وترى حبل الكذب قصير ، وخل عندكم رقابة ذاتيه قبل لا تخافون من رقابة البشر والانسان اللي عارف نفسه إنه ماشي صح وماجالس يسوي غلط مايخاف ويجبل لا يهزك ريح .

الكلام اللي فوق تقدرون تعتبرونه إنه اعترافات عن تصرفات ماتعجبني وتقدرون تعتبرونها رسائل على طريقة إياك أعني واسمعي ياجاره ولا حد يزعل لأن مايصح الا الصحيح .

طيب أكمل :

أحب الاطفال بس البنات هم الأفضل عندي ،

توقعاتي وحدسي يتحقق وما أبالغ لو قلت بنسبة 99 % ، بس لاحد يقول لي وش تتوقعين في الأمر الفلاني لأن مو هذا اللي أقصده أقصد الشي اللي يجي في بالي او الشي اللي أتوقعه من نفسي اتجاه أي شي فغالبا يصير .

اعترف اني ضعيفة جدا جدا عند الحلويات وهو اللي مخرب علي في الوزن .

اعترف اني اعتذر لو أخطأت وهذي قناعة عندي أن الاعتذار عند الخطأ يرفع من قيمة الانسان ومايقللها.

شخصية كتومة وحساسة .

الحمدلله يارب عندي قدرة تحمل وتعايش مع الظروف ، أقدر ظروف الناس اللي حواليني .

اعترف إني بليده في الرياضيات درجة أولى .

أحب أعطي جرعات تحفيز للناس الطموحين ، أحب أسندهم ، وأكره شي اسمه تكسير مجاديف .

الاعتراف الاخير إني ماأقدر أسامح الناس اللي جرحوني في يوم من الايام ممكن اتعامل معاهم في حدود الرسمي فقط  ويظل اللي في القلب في القلب .

وبس ،،،،، سيوووووو

 
8 تعليقات

Posted by في 2010/11/06 in شي في الخاطر