RSS

Monthly Archives: أغسطس 2010

ســــاره

صباحكم ورد ، طاعة للرحمن وتوفيق وسعادة

تعرفت عليها تقريبا من ثلاث سنوات إذا مب أكثر ، وصرت شغوفه بزيارتها
ومتابعة أخبارها، وكانت حديثي في البيت ، حبيتها بجد حسيت كأنها بنتي لدرجة
جاني شعور أو أمنية واقول في نفسي متى أشوفها عروس ، سبحان الله المحبة من الله
يمكن لأنها طفلة ، حقيقة سبب كتابتي للتدوينه إعجابي بأسلوب التعامل معها من والدينها
خاصة في اتخاذ القرار في اختيار الالعاب او الاكل او غيره طبعا أكيد في توجيه هذا مافيه شك، فجالسه أفكر ياترى لما الطفل من صغره يلقى تربية على اتخاذ القرارات ومن صغره والثقة بالنفس هي أحد صفاته وتمتع في مرحلة طفولته وعاشها بالطريقة الصحيحة أتوقع أنه لما يكبر بيكون شخصية قيادية واثقة منطلقه طموحه ، والا ؟ شرايكم ؟
عجبتني فكرت المدونة بكرا لما تكبر وتشوف طفولتها كيف عاشتها تتوقعون شنو شعورها ، شنو مردود هالذكريات الجميله عليها ؟

الله يبارك فيها ويحفظها ويخليها لوالديها ويخليهم لها ويحقق أمنياتهم فيها .

Advertisements
 
5 تعليقات

Posted by في 2010/08/29 in مما راق لي

 

تشاكيل

مساكم رضا من ربي ،،، مساكم شفاء لمن تحبون وأحب

الله يسلمكم كنت أكلم شاب طموح على المسن وقرقت عليه ألين حامت تسبده بعدين قال لي لو سمحت أبكتب موضوع  جديد بمدونتي << يعني يرحم والديني ووالدينك خلصينا بسكاتك خل أشوف شغلي <<< لا حرام مايقصد
المهم الا مير تطقني الغيران وقلت وش زوده علي يوم أنه ينزل موضوع وأنا لا ومحدش أحسن من حد عاد قلت خل أغير المود والسستم وكل ابو الالفاظ المنتشره هالايام في طريقة التدوين عندي ، البوست هذا خليطي :

ريحته رووووعه ماشاء الله تبقى يومين كل ماأمر من غرفتي أشم ريحته
حقيقة من عشاق عطورات أجمل تعجبني ريحتها .
طبعا العطر ملطوش بس بأدب ، لقيت هذا العطر عند أمي الله يطول بعمرها على طاعته
قلت يمه العطر هذا ريحته شيييي قالت هذا هديه من أم فلان ، عاد يوم
جيت ارجعه للغرفه قامت وقسمت أيمان مغلظه إن أخذه ، فشسمه الله يخليكم
لا حد يتفلسف علي ويقول هذا عقوق هي عطتني اياه برضاها .
سلطة رمان
بجد لذييييذه ، ذاقها شاب طموح وعجبته بعدين سويتها مره ثانيه وقلت لولد أخوي
يذوقها في البدايه جلس يقط تعليقات ومو مقتنع إنها لذيذه مع إنه ماذاقها بس يوم كلها
شبك فيها واعجبته ،
المقادير:جرجير ، خس ، رمان
الصوص : ليمونه ، ملعقه صغيره خل ، زيت زيتون ، ملح .

رولات التوست
خفيفه ولذيذه وتخدم في الطوارئ
المقادير: 
صدور دجاج ، حبه كوسه ، حبه جزر ؛ حبه فليفله ، ذره ، بقدونس ، بصل ، ثوم  ،
الطريقة:
نقطع الدجاج مكعبات رقيقه ونقلقلها على النار لين تنشف المويه
نحمس بصل وثوم ثم نضيف الدجاج ونقلبه ونضيف البهارات بعدين نضيف الخضار طبعا كلها مبشوره ماعدا الفليفله والبصل مكعبات والذره ونخليه على نار هاديه شوي .
بعدين نفرد التوست وندهنه بشوي مايونيز ونحشيه .
ذكريااات شعبان ، 1431هـ <<< ترى يدي مب معهم  والا كان هجيتوا
في ليله من الليالي كانوا بنات اخوانيني (2 أخو ) هههههه
زهقانات فقمت اقترحت عليهم نلعب لعبه فاختاروا لعبة الفواكه طبعا مدري وش سالفة اللعبه بس عادي لعبة مهم والله حلوه وقضى الوقت واستمتعوا وأنا اللي أخذت المركز الأول طبعا حقيقة لي هدف من إني أنزل لكم الصوره وأقول السالفه ، وش اللي يمنعنا من اللعب مع إخوانا وأولادنا وبزارنينا حتى لو كنا كبار ، ليش مانشاركهم المتعه ، مهوب عيب يمكن البعض يقول خير سلامات وش كبرك وتلعبين مع مراهقات وأنت كبر أمهم
عمر اللعب ماكان محصور بعمر معين ، يمكن يكون فيه ضوابط وشروط صحيح لكن أبدا مايمنع .
الله يحلي أيامي وأيامكم بكل خير وطاعه وسلامة والدينا
المقادير:
باكيت بسكويت شاي مطحون
سويس رول بالشكولاته حلقات
2 ظرف كريم كرمل
2 دريم ويب
6 حبات جبن كيري
3 بيالات حليب سايل
ملعقة ص نسكافيه
2 ملعقه شوكولاته سايله
للتجميل: توفي ، مكسرات ، أو هيرشي
الطريقة:
يوضع في قاع كل كاس شريحة سويس رول
نخلط المقادير الباقيه في الخلاط  ثم نضيفه فوق السويس رول ويزين بالتوفي والمكسرات
 
 

قرقع قريقعان …..

اروح وطي معاها ياقلبوووس
قرقيعان وقرقيعان بين اقصير ورمضان

عادت عليكم صيام كل سنة وكل عام

يالله تخلي ولدهم يالله خلي لأمه يالله

عسى البقعة ماتخمه ولا توازي على امه 
صبحكم الله بالخير وياهلا ويامسهلا
تعريف بمفهومي القديم البزرنجي اللي عشته يومني صغيره هو:
القريعان عباره عن مكسرات وحلويات توزع على الاطفال في تاريخ 13 أو 14أو 15 من رمضان وكانوا اول ايامي انا نروح كلبونا البزارين ونطق باب الجيران ونقول الانشوقه الجميلة اللي فوق وعاد يعطونا حلويات طبعا معنا أكياس  <<< حسيتني اعرف تعريف لمادة التاريخ
بصراحه من كم سنة قريت فتوى بعدم جواز القرقيعان وانه
فيه تشبه باليهود مدري مين مومتذكره والله بالضبط
واحتج بعض المشايخ أنه يعود عيالنا على الطرارة (الشحاته )
طبعا كلام الشرع على عيني وراسي بس اذكر لمن كنت صغيره وحليلي لابسه بخنق << حسافه ماصورتني
كنا نروح وندور على البيوت وفي المقابل الأطفال يجون بيتنا
وابدا ماكان في بالنا ولا في بال اهلينا انه بيعودنا على قلة الادب والذوق
والشحاته وهذا احنا كبرنا يالله لك الحمد وش حلاتنا كننا البخت
بعدين الوضع تغير الحين الاطفال ماصاروا يطلعون ويطقون بيوت الناس
خل الاهل والجيران يتزاورون عشان عيالهم تطلع ، أساسا خلقه قطاعه
بين الجيران مافي تواصل فهي مجرد فرحة بين اطفال العايله والاحباب
في البيت ومافيها اي تكلف ، طيب  العييايد او العيديه برضوا من الصغر تربينا عليها
وابوي ربي يطول في عمره ويشفيه ويخليه لنا يارب هو وامي
من شهر شعبان وهو مجهز العيديات ،
في بالي سؤال ومااعرف اجابته:  
هل في دليل يثبت أنه كان في أيام الرسول صلى الله عليه وسلم وايام الصحابه عيديات ؟
طبعا أنا ضد المبالغات اللي يسونها الحريم في القريقعان واستئجار
القاعات والتنافس في اظهار قريعان ولدها أحسن من الثانيه
المهم أنا مدري وش فيني السنة على القريقعان ، ابي اقرقع
على فكره في بيتنا مافيه لانهم معارضين له بسبب الفتوى .
قرقع قريقعان …..عطونا الله يعطيكم
بيت مكة يوديكم ….يا مكة يا معمورة يا أم السلاسل والذهب
عطونا من مال الله ….يسلم لكم عبد الله
عطونا دحبة ميزان ….يسلم لكم عزيزان
يا بنية يا لحبابة … ابوكي مشرع بابه
باب الكرم ما صكه …ولا حط له بوابة
 
 
وعساكم من عواده
 
 

منيونا

ارحبوووووووووووووووووووووووووووو ، من زمان عنكم والله مدري وش فيني
يجي في بالي مواضيع وأحيانا طبخات وقول بنزلها بعدين تجيني صدت نفس واطنش وكذا << مهوب كني اقول قصة حياتي   🙂 <<  حتى الحين بس قلت غصب طيب بنزل ، مالكم بالقصيره  🙂

شيش طاووووووووق  & حمص & بوتيتس   🙂

المقادير : دجاج
بصل
فلفل
طماط
بهارات
التتبيله : قشطة ، زبادي ، ليمونه ، خل ، بهارات ، ملح
الطريقة : نقطع الدجاج الى مكعبات متوسطة الحجم بعد نزع الجلد والعظام
نتبلها في الخلطة السابقة 3 ساعات بالنسبة لي تبلتها من الليل ودخلتها الثلاجه كذا تكون الذ وأطعم
في الظهر دخلتها في الاعواد مع بصل وطماط وفلفل مقطعه مكعباات
ثم وضعت في صينية الفرن شرايح بصل وزيت زيتون وفنجانين ماء وقصدرته ودخلته الفرن
بالنسة لي تركته في الفرن ساعتين لكن يكفي نص ساعه الى ساعه
بعد مااستوى ونشف الماء حمرت الدجاج ثم اخذت فحمه ووضعتها في كوب وفوقها قطعه زبدة ووضعتها
على اسياخ الدجاج ثم كتمت الصينيه حتى يبقى ريحة الفحم وكأنه مشوي .

قدمته مع حمص واعواد بطاطس وممكن يقدم معه سلطة

كان لذيييييييييييييييييييييييييييييييييييييييذ .








كنافة كذابة

المقادير:
توست مطحون ومفروك بالزبدة اقسمه نصين
مهلبية : كاسين ماء + فنجان سكر + 5 ملاعق حليب بعد أن يغلي أضيف له ملعقتين نشا
الطبقة الاولى توست بعدين مهلبية بعدين توست يتحمر من فوق وتحت اذا استوى فوقه شيره
ويدخل الثلاجه لحين التقديم

برضوا كانت لذيذه وخفيفه .

شرايكم فيني وانا اشرح   🙂





رهيبة
سلطة رهيييييبة <<<< ياتسالي 🙂

جرجير
خس
ذرة
مكعبات بطاطس مقلي
الصوص: زبادي & فص ثوم & ملعقة خل & ملح & ليمون




حبيب الشعب السعودي اللي لايمكن سفرة سعودية رمضانية تخلو منه ( القيمات )

كاس طحين
فنجان نشا
فنجان حليب بودره
ملعقة خميره
ملعقة بيكنج باودر
ملعقة زيت
فنجانين لبن
وشوي ماء




ميلو راسكم بس انتبهوا يطق عرق   🙂

ليمون & نعناع ، سكر  <<< اآووووووووش



باقي الاطباق ان شاء الله انزلها بعدين


فتوكو بعافيه ورمضان كريم
 
21 تعليق

Posted by في 2010/08/17 in أطباقي

 

مبارك علينا وعليكم شهر البركات

أدعو ربي أن يبلغنا ووالدينا وجميع المسلمين بالعمل الصالح الخالص
ويعيننا على قيامه وصيامه .